மதுரையில் வரதட்சணை கொடுமை:இளம் பெண் தற்கொலை – கணவர், மாமியார், மாமனார் உள்பட 11 பேருக்கு வழக்கு

மதுரையில் வரதட்சணை கொடுமை:
இளம் பெண் தற்கொலை – கணவர், மாமியார், மாமனார் உள்பட 11 பேருக்கு வழக்கு

மதுரை அருகே செல்லூரில், வரதட்சணை கொடுமையால் மனமுடைந்த இளம் பெண் பிரியதர்ஷினி தற்கொலை செய்து கொண்ட சம்பவம் பரபரப்பை ஏற்படுத்தியுள்ளது.

சம்பவம்

பிரியதர்ஷினி, ரூபன் ராஜ் என்பவரை திருமணம் செய்து வாழ்ந்து வந்தார். திருமணத்தில் 150 சவரன் நகை வழங்கப்பட்டிருந்ததாக கூறப்படுகிறது. இருப்பினும், கணவர் மற்றும் மாமியார், மாமனார் தொடர்ந்து கூடுதலான வரதட்சணை கேட்டதாக பெண் பக்கம் குற்றம் சாட்டியுள்ளது.

இதனால் குடும்பத்தில் அடிக்கடி தகராறு ஏற்பட்டதாகவும், கடந்த மே மாதத்தில் பெண் பக்கம் செல்லூர் காவல் நிலையத்தில் புகார் அளித்ததாகவும் தகவல் வெளியாகியுள்ளது. இதையடுத்து தம்பதிகள் தனித்தனியாக வாழ்ந்துள்ளனர்.

இதற்கிடையில், கணவருக்கு வேறு பெண்ணை திருமணம் செய்து வைக்க திட்டமிட்டதாகவும், இதற்காக மேலும் 150 சவரன் நகை கேட்கப்பட்டதாகவும் கூறப்படுகிறது. இதனால் மனமுடைந்த பிரியதர்ஷினி தூக்க மாத்திரை குடித்து தற்கொலைக்கு முயன்றார். உடனடியாக மருத்துவமனையில் அனுமதிக்கப்பட்டும் உயிரிழந்தார்.

உறவினர்களின் குற்றச்சாட்டு

பிரியதர்ஷினியின் உறவினர்கள், “அரசியல் அழுத்தத்தால் போலீசார் வழக்கு பதிவு செய்வதில் தாமதம் செய்தனர். ரூபன் ராஜாவின் தந்தை அதிமுகவுடன் தொடர்பு கொண்டவர் என்பதால் போலீசார் நடவடிக்கை எடுக்கவில்லை,” என்று குற்றம் சாட்டினர். இதனை எதிர்த்து ராஜாஜி அரசு மருத்துவமனை முன்பு போராட்டம் நடத்தினர்.

போலீசார் நடவடிக்கை

சந்தேக மரணம் என போலீசார் வழக்கு பதிவு செய்து, கணவர் ரூபன் ராஜ், மாமனார் லிங்கேஸ்வரன், மாமியார் தனபாக்கியம் உள்ளிட்ட 11 பேருக்கு எதிராக வழக்கு பதிவு செய்துள்ளனர்.

பின்னணி

தற்கொலை எந்த பிரச்சினைக்கும் தீர்வாகாது என்பதில் நிபுணர்கள் வலியுறுத்துகின்றனர். குடும்பத் தகராறுகள் அல்லது அழுத்தங்கள் ஏற்பட்டால், பாதிக்கப்பட்டவர்கள் மனநல ஆலோசகர்களின் உதவியை நாடலாம் என்று சமூக ஆர்வலர்கள் வேண்டுகோள் விடுத்துள்ளனர்.