செங்கோட்டையன் அதிரடி அறிவிப்பு, ஜெர்மனியில் முதலீட்டு ஒப்பந்தங்கள் – முக்கிய செய்திகள்

அதிமுக – திமுக அரசியல் குற்றச்சாட்டு, செங்கோட்டையன் அதிரடி அறிவிப்பு, ஜெர்மனியில் முதலீட்டு ஒப்பந்தங்கள்

முதலில், மதுரை:

மேலூரில் நடைபெற்ற பிரச்சார கூட்டத்தில் அதிமுக பொதுச்செயலாளர் எடப்பாடி பழனிசாமி,
“ஹெட்ரோ கார்பன், மீத்தேன் போன்ற திட்டங்களை டெல்டா மாவட்டங்களில் செயல்படுத்தி, விவசாயிகளுக்கு விரோதமாக செய்கிறார்கள்” என்று திமுக அரசுக்கு எதிராக குற்றம் சாட்டினார்.
விவசாயிகளை பாதிக்கும் எந்த திட்டம் வந்தாலும் அதிமுக எப்போதும் குரல் கொடுக்கும், ஆனால் திமுக அப்படி இல்லை என்றும் அவர் வலியுறுத்தினார்.

சென்னை:

முன்னாள் அமைச்சர் செங்கோட்டையன் அதிமுக தலைமையுடன் அதிருப்தியில் உள்ளதாக தகவல்கள் வெளிவந்துள்ள நிலையில், “வரும் செப்டம்பர் 5ஆம் தேதி, கோபிசெட்டிபாளையத்தில் கட்சி அலுவலகத்தில், எனது அரசியல் நிலைப்பாடு குறித்து மனம் திறந்து பேசப் போகிறேன்” என்று அறிவித்துள்ளார். அவரது ஆலோசனையில் சசிகலா, பன்னீர்செல்வம், டிடிவி தினகரன் உள்ளிட்டோர் மீண்டும் ஒன்றாக வேண்டும் எனக் கருத்து தெரிவித்துள்ளார் என கூறப்படுகிறது. இதனால் அதிமுக வட்டாரத்தில் பரபரப்பு நிலவுகிறது.

சர்வதேசம் – ஜெர்மனி:

முதல்வர் மு.க. ஸ்டாலின் தலைமையில் ஜெர்மனியில் நடந்த முதலீட்டாளர் மாநாட்டில் மொத்தம் 26 புரிந்துணர்வு ஒப்பந்தங்கள் கையெழுத்தாகியுள்ளன. இதன் மூலம் ரூ.7,020 கோடி முதலீடு மற்றும் 15,320 புதிய வேலை வாய்ப்புகள் உருவாகும் என்று அரசு அறிவித்துள்ளது. இதற்கிடையில், “இந்த ஒப்பந்தங்கள் சென்னை தலைமைச் செயலகத்தில் நடந்திருக்கலாம்… ஜெர்மனி செல்வதற்கு அவசியம் என்ன?” என பாமக தலைவர் அன்புமணி ராமதாஸ் கேள்வி எழுப்பியுள்ளார்.

புதுடில்லி:

ஜனாதிபதி திரௌபதி முர்மு, இந்தியா வேகமாக வளரும் பொருளாதாரமாக மாறி வருவதாகவும்,
அதற்கான முக்கிய பங்கு வங்கிகளுக்கே சேர்ந்தது என்றும் தெரிவித்தார்.
விவசாயிகளுக்கு எளிதான கடன் வழங்கும் பணி வங்கிகளின் முக்கிய பொறுப்பு எனவும்,
சிறு, குறு, நடுத்தர தொழில்துறைகள் அதிக வேலைவாய்ப்பை உருவாக்குவதால் அவற்றுக்கு அதிக ஆதரவு வழங்கப்பட வேண்டும் என்றும் வலியுறுத்தினார்.