‘ஜனநாயகன்’ இசை வெளியீட்டு விழாவிலும் சிக்கலா? – மலேசிய அரசு விதித்த கட்டுப்பாடுகள்

நடிகர் விஜய் நடித்துள்ள ‘ஜனநாயகன்’ திரைப்படத்தின் இசை வெளியீட்டு விழாவுக்கு மலேசிய அரசு பல்வேறு கட்டுப்பாடுகளை விதித்துள்ளதாக தகவல்கள் வெளியாகி, ரசிகர்களிடையே பரபரப்பை ஏற்படுத்தியுள்ளது. கோலாலம்பூரில் நடைபெறவுள்ள இந்த பிரமாண்ட விழா தற்போது அரசியல் விவாதங்களுக்கும் மையமாகியுள்ளது.

விஜய்யின் கடைசி படம் என்ற எதிர்பார்ப்பு

‘ஜனநாயகன்’ படத்தை ஹெச்.வினோத் இயக்கியுள்ள நிலையில், அனிருத் இசையமைத்துள்ளார். பூஜா ஹெக்டே, மமிதா பைஜூ, பிரியாமணி, பாபி தியோல், கௌதம் வாசுதேவ் மேனன், நரேன் உள்ளிட்ட பலர் முக்கிய கதாபாத்திரங்களில் நடித்துள்ளனர். கர்நாடகாவைச் சேர்ந்த கேவிஎன் நிறுவனம் இப்படத்தை தயாரித்துள்ளது.

விஜய், தமிழக வெற்றிக் கழகம் என்ற அரசியல் கட்சியை தொடங்கி முழுமையாக அரசியலில் ஈடுபட உள்ளதால், ‘ஜனநாயகன்’ அவருடைய கடைசி திரைப்படமாக இருக்கும் எனக் கூறப்படுகிறது. இதுவே படத்தின் மீதான எதிர்பார்ப்பை பல மடங்கு அதிகரித்துள்ளது.

பொங்கல் வெளியீடு – இசை விழா கோலாலம்பூரில்

‘ஜனநாயகன்’ திரைப்படம் பொங்கல் பண்டிகையை முன்னிட்டு வரும் ஜனவரி 9-ம் தேதி திரையரங்குகளில் வெளியாகிறது. அண்மையில் வெளியான ‘தளபதி கச்சேரி’, ‘ஒரு பேரே வரலாறு’ ஆகிய பாடல்கள் ரசிகர்களிடையே நல்ல வரவேற்பைப் பெற்றுள்ளன.

இந்த நிலையில், படத்தின் இசை வெளியீட்டு விழா மலேசியாவின் கோலாலம்பூரில் வரும் 27-ம் தேதி பிரமாண்டமாக நடைபெறவுள்ளதாக படக்குழு அறிவித்துள்ளது. மேலும், படத்தின் டிரெய்லர் 2026 ஜனவரி 1-ம் தேதி வெளியாகும் என தகவல் வெளியாகியுள்ளது.

மலேசிய அரசின் உத்தரவு – அரசியல் பேச தடை

இசை வெளியீட்டு விழா மலேசியாவில் நடைபெறவுள்ளதால், அந்நாட்டு அரசு சில முக்கிய கட்டுப்பாடுகளை விதித்துள்ளதாக கூறப்படுகிறது. குறிப்பாக, விழாவில் எந்தவிதமான கட்சி சார்ந்த நிகழ்வுகளும், அரசியல் உரையாடல்களும் இடம்பெறக்கூடாது என தெளிவாக உத்தரவிடப்பட்டுள்ளதாக தகவல் வெளியாகியுள்ளது.

மேலும், ரசிகர்கள் தமிழக வெற்றிக் கழகத்தின் கட்சி கொடி, துண்டு அல்லது கட்சியை குறிக்கும் எந்த அடையாளங்களையும் பயன்படுத்தக் கூடாது என அறிவுறுத்தப்பட்டுள்ளதாக கூறப்படுகிறது. இந்த விதிமுறைகளை மீறினால் கடுமையான நடவடிக்கை எடுக்கப்படும் என ‘ஜனநாயகன்’ படக்குழுவுக்கு மலேசிய அரசு எச்சரிக்கை விடுத்துள்ளதாகவும் தகவல்கள் தெரிவிக்கின்றன.

தெலுங்கு வெளியீட்டில் சிக்கல்

முன்னதாக, ஆந்திரா மற்றும் தெலங்கானா மாநிலங்களில் சங்கராந்தி பண்டிகையை முன்னிட்டு பிரபாஸின் ‘ராஜா சாப்’, சிரஞ்சீவியின் ‘Mana ShankaraVaraprasad Garu’ போன்ற பெரிய படங்கள் வெளியாக உள்ளதால், ‘ஜனநாயகன்’ படத்திற்கு திரையரங்குகள் கிடைப்பதில் சிக்கல் ஏற்பட்டுள்ளதாக கூறப்படுகிறது.

இதன் காரணமாக, தெலுங்கு மொழியில் படத்தை வெளியிட இருந்த விநியோகஸ்தர் பின்வாங்கியதாகவும், ஆந்திரா மற்றும் தெலங்கானா மாநிலங்களில் வெளியீடு கேள்விக்குறியாகி உள்ளதாகவும் தகவல்கள் வெளியாகியுள்ளன.

இந்தி மற்றும் வெளிநாட்டு சந்தை நிலவரம்

இந்தி பேசும் மாநிலங்களில் ‘ஜனநாயகன்’ படத்தின் தியேட்டர் உரிமையை ஜீ ஸ்டூடியோஸ் நிறுவனம் கைப்பற்றியுள்ளது. ஆனால், இந்தி சந்தையில் போதுமான புரமோஷன் இல்லாதது படத்தின் வசூலை பாதிக்கலாம் என்ற கவலை படக்குழுவுக்கு இருப்பதாக கூறப்படுகிறது.

அதே நேரத்தில், வெளிநாடுகளில் படத்திற்கான டிக்கெட் புக்கிங் தொடங்கி நல்ல வரவேற்புடன் நடைபெற்று வருகிறது. மொத்தத்தில், வெளியீட்டுக்கு முன்பே ‘ஜனநாயகன்’ படம் அரசியல், வெளியீட்டு சிக்கல்கள் மற்றும் சர்ச்சைகளால் தொடர்ந்து பேசுபொருளாகி வருவது குறிப்பிடத்தக்கது.