குமரியின் பிரம்மாண்டம் – கிறிஸ்துமஸ் டெக்கரேஷனுக்கு லட்சங்களில் செலவு

கிறிஸ்துமஸ் பண்டிகை – உலகம் முழுவதும் அன்பின் திருவிழா

கிறிஸ்துமஸ் பண்டிகை உலகம் முழுவதும் மகிழ்ச்சியும் ஆனந்தமும் கலந்த ஒரு முக்கியமான திருநாளாக கொண்டாடப்படுகிறது. இயேசு கிறிஸ்துவின் பிறப்பை நினைவுகூரும் இந்த நாளின் மையக் கருத்து, மனிதர்களிடையே அன்பு, சகோதரத்துவம், ஒற்றுமை வளர வேண்டும் என்பதே. இதனை முன்னிறுத்தி, உலகெங்கும் உள்ள கிறிஸ்தவர்கள் ஒவ்வொரு ஆண்டும் டிசம்பர் 25ஆம் தேதி கிறிஸ்துமஸ் பண்டிகையை கொண்டாடுகின்றனர்.

தமிழ்நாட்டில் கிறிஸ்துமஸ் – பக்தியும் மகிழ்ச்சியும் கலந்த கொண்டாட்டம்

தமிழ்நாட்டில் கிறிஸ்துமஸ் பண்டிகை பக்தியும் மகிழ்ச்சியும் கலந்த ஒரு சிறப்பு நாளாகக் கொண்டாடப்படுகிறது. கிறிஸ்துமஸ் நாளில் கிறிஸ்தவ தேவாலயங்களில் சிறப்பு பிரார்த்தனைகள், நள்ளிரவு திருப்பலி நடைபெறுகிறது.

வீடுகள் மற்றும் தேவாலயங்களில் நட்சத்திர விளக்குகள், கிறிஸ்துமஸ் மரம், இயேசு பிறந்த குடில் ஆகியவற்றால் அலங்கரிக்கப்படுகின்றன. கேக், இனிப்புகள் பகிர்ந்து, அன்பையும் ஒற்றுமையையும் வெளிப்படுத்துவது கிறிஸ்துமஸ் கொண்டாட்டத்தின் முக்கிய அம்சமாகும்.

டிசம்பர் தொடக்கத்திலேயே தொடங்கும் கிறிஸ்துமஸ் உற்சாகம்

பொதுவாக கிறிஸ்துமஸ் கொண்டாட்டம் டிசம்பர் மாத துவக்கத்திலேயே தொடங்கிவிடுகிறது. தமிழ்நாட்டின் பல்வேறு மாவட்டங்களில் வீடுகள், தேவாலயங்கள் அனைத்தும் ஸ்டார் லைட்ஸ், கிறிஸ்துமஸ் மரங்கள், குடில்கள் கொண்டு அலங்கரிக்கப்படுகின்றன.

என்றாலும், அனைத்து இடங்களிலும் பிரம்மாண்டமாகவும் பல லட்ச ரூபாய் செலவழித்தும் கிறிஸ்துமஸ் கொண்டாடப்படுவதில்லை.

கன்னியாகுமரி மாவட்டம் – பிரம்மாண்ட கிறிஸ்துமஸ் கொண்டாட்டத்தின் மையம்

ஆனால் கன்னியாகுமரி மாவட்டம் இதிலிருந்து முற்றிலும் வேறுபடுகிறது. இங்கு கிறிஸ்துமஸ் பண்டிகை என்பது ஒவ்வொரு வீட்டிலும், தேவாலயங்களிலும் பல லட்ச ரூபாய் செலவில் நட்சத்திர விளக்குகள், கிறிஸ்துமஸ் மரங்கள், பிரம்மாண்ட குடில்கள் அமைத்து கொண்டாடப்படும் ஒரு பெருவிழாவாக மாறியுள்ளது.

“மத வேறுபாடு இல்லாமல் அனைவரும் ஒன்றாக” – உள்ளூர்வாசி கருத்து

இந்த தனித்துவமான கொண்டாட்டம் குறித்து, கன்னியாகுமரி மாவட்டம் கருங்கல் பகுதியைச் சேர்ந்த சதீஷ் கூறுகையில்,
“கன்னியாகுமரி மாவட்டத்தில் மத அடிப்படையில் இல்லாமல் அனைவரும் ஒன்றாக கிறிஸ்துமஸ் பண்டிகையை கொண்டாடுவார்கள். குழந்தைகள் விருப்பப்படி வீடுகளில் ஸ்டார்கள் தொங்கவிடுவது வழக்கமாக இருந்தது. இதுவே நாளடைவில் வளர்ந்து, சிறிய குடில்களாகவும், பின்னர் பெரிய அளவிலான குடில்களாகவும் மாறியது” எனத் தெரிவித்தார்.

சிறிய குடில்களிலிருந்து பிரம்மாண்ட குடில்கள் வரை – வளர்ந்த பாரம்பரியம்

ஆரம்பத்தில் சிறிய வீடுகளில் சிறிய குடில்கள் மட்டுமே அமைக்கப்பட்டன. பின்னர், பொது இடங்கள், தேவாலயங்கள் என ஊரெங்கும் குடில்கள் அமைக்கத் தொடங்கினர்.

நாளடைவில் இது வளர்ந்து, தற்போது மிகப்பெரிய மற்றும் பிரம்மாண்ட குடில்கள் அமைக்கும் அளவிற்கு வந்துள்ளது. குறிப்பாக பாலப்பள்ளத்தில் அமைக்கப்படும் பிரம்மாண்ட குடில்கள், கடந்த சில ஆண்டுகளாகவே அனைத்து தரப்பினரின் கவனத்தையும் ஈர்த்து வருகிறது.

ஒரு ஊரைப் பார்த்து மற்ற ஊர்கள் – போட்டியாக மாறிய கொண்டாட்டம்

ஒரு ஊரில் அமைக்கப்படும் குடில்களை பார்த்து, மற்ற ஊர்களும் அதைவிட பெரிய குடில்களை அமைக்கத் தொடங்குவது இன்று வழக்கமாகிவிட்டது. இது தற்போது கன்னியாகுமரி மாவட்டத்தின் தொன்று தொட்ட ஒரு பாரம்பரியம் போலவே மாறியுள்ளது.

முன்பெல்லாம் ஸ்டார் லைட்ஸ், சிறிய குடில் மட்டுமே இருந்தது. ஆனால், தொழில்நுட்ப வளர்ச்சியுடன், தேவாலயங்களிலும் வீடுகளிலும் தீம் அடிப்படையிலான, நவீன குடில்கள் அமைக்கப்படுகின்றன.

குடில்களை காண்பதே ஒரு பொழுதுபோக்கு

இன்றைய சூழலில், கிறிஸ்துமஸ் விடுமுறை நாள்களில் பாலப்பள்ளம் உள்ளிட்ட பகுதிகளில் அமைக்கப்படும் பிரம்மாண்ட குடில்களை பார்க்க வருவது, பல ஊர்களை சுற்றி குடில்களை பார்ப்பது, தேவாலயங்களில் அமைக்கப்படும் பிரம்மாண்ட லைட்டிங் அலங்காரங்களை ரசிப்பது அனைத்தும் ஒரு என்டர்டைன்மென்ட் போல மாறிவிட்டது.

குடும்பங்களுக்கும் வியாபாரிகளுக்கும் பயன்

குழந்தைகளுடன் குடும்பமாக வந்து இந்த குடில்களை கண்டு களிப்பது, கிறிஸ்துமஸ் – புத்தாண்டு காலத்தின் சிறந்த பொழுதுபோக்காக மாறியுள்ளது.

மேலும், குடில்கள் அமைக்கப்படும் பகுதிகளில் உணவுக் கடைகள், தற்காலிக வியாபாரக் கடைகள் அதிகளவில் அமைக்கப்படுகின்றன. இதனால், தற்காலிக கடை அமைக்கும் வியாபாரிகளுக்கு நல்ல வருவாய் கிடைக்கிறது, உள்ளூர் பொருளாதாரத்திற்கும் இது உதவிகரமாக அமைகிறது.

கன்னியாகுமரி கிறிஸ்துமஸ் – அன்பும் கலாச்சாரமும் கலந்த பெருவிழா

மொத்தத்தில், கன்னியாகுமரி மாவட்டத்தின் கிறிஸ்துமஸ் கொண்டாட்டம் என்பது மதம் கடந்த அன்பு, ஒற்றுமை, கலாச்சாரம், பொழுதுபோக்கு அனைத்தையும் ஒன்றிணைத்த ஒரு பிரம்மாண்ட பெருவிழாவாக இன்று திகழ்கிறது.